DIE BABA-SIKLUS

Aan al die mammas met jong babas – hierdie een is vir julle…

My jongste, nou amper 4 maande oud, is stééds op die 2-uurlikse klok! Jy kan maar weet, as die uurwyser nader aan die 2-uur merk kruip, is dit asof daar ‘n alarmpie binne hom afgaan…en sy stembande aktiveer!
Die hele doek-voed-burp-sus-slaap siklus perk mens vreeslik in…wel, ten minste is dit voorspelbaar, nê?
Maar as ek eeeenige iets nie-babaverwant gedoen wil kry, is die normaalweg rustige ekke (kyk, ek hou van n bietjie ‘dawdle’) nou ‘n volwaardige ingeoefende ‘speedy gonzales’.

Dan is boetie ook ‘n regte ‘velcro’ baba. Tydens wakkertyd is hy nét in jou arms tevrede…en dan is hy nog kieskeurig ook: met hóm mag jy nie sit nie. Glo my, al is hy vas aan die slaap, wéét hy as jou boude die bank raak. Dan word daar behoorlik keel opgesit tot jy weer hom stap-stap in jou arms bons – tot jou rug lam is en jou arms wil afbreek…

En dan, as jy hom uiteindelik v.e.r.s.i.g.t.i.g in sy bedjie wil neerlê, maak Oudste die deur oop! My oë en mond vra hom om groot asseblief saggies weer uit te gaan…”Ek maak gou vir boetie aan die slaap”, fluister ek deur my tande. So oulik soos wat my oudste kabouter is, kan die hele baba-aan-die-slaap-kry-met-oudste-in-die-huis situasie soms baaaaie frustrerend raak!
My woelwater vra kliphard terug: “Slaap boetie?!” Ek skud my kop “ja”. En doef-doef-doef hardloop hy weer by die kamer uit…net om te onthou dat hy die kamerdeur moet toe trek (of in sy geval, meer soos toeklap). Gwaaah-kliek gaan die deur weer op knip. Ek sus en shhhhh shhhhhh shhhhh van voor af weer vir boetie, wie se oë natuurlik nou weer wawyd oop is. Gaaf, dankie seunie.

Sug.

O ja…en die ergste van als is: wanneer ek wel vir 5 minute op die kombuistoonbank sit en my nou-al-koue koppie rooibostee geniet, hoor ek (‘non-existent’) babas wat huil…

Wie weet waarvan ek praat??

Vrede vir julle,

‘Dawdle’: talm, draai, tyd vermors

Advertisements

AG, DIS SOMMER…SNOLLIES

Winter: loop-neusie-seisoen.

Daardie verdomde klewerige mukoïede substanse wat gestalte kry agter in jou baba se petite lugweë…dis regtig sleg.
En dit suig nóg meer as jou klein mensie as gevolg van díé goed nie kan asem kry nie!

Dit klink dalk simpel, maar ek sal jou sê, dit was vir my een van die mees angswekkende ervarings toe my jongste (toe 1 maand oud) erg benoud na sy asem gesnak het – babatjies haal hoofsaaklik deur hul neusies asem – en dít nog in die hospitaal en op suurstof!! Dis mal hoe vinnig so iets kan gebeur….

My boetiebaba was vir die tweede keer in ‘n week se tyd by die hospitaal opgeneem. Eerste keer, virale meningitis (sien op Facebookblad: ‘Meningitis – As jou brein pyn’). Dié keer met bot-toe longetjies, ribbekassie wat intrek en magie wat paradoksaal uitpop soos hy probeer asemhaal. Diagnose: RSV (sien ‘RSV – Really Stupid Virus’).

Later, veilig in die kindersaal, kan ek mos nou semi-ontspan. Vasgeplak teen sy klein wangbeentjies loop die nasale kanules wat suurstof volstoom in sy neusie blaas. Hy kry gereeld neusdruppeltjies om al die hardnekkige slyme los te maak en op te droog. Selfs die fisio kom beklop hom 2 keer per dag. Als was okay. Beter…En toe word dit nag. Letterlik.

Ek weet nou nog nie presies wat gebeur het nie, maar êrens deur die loop van die nag (en kyk, nagtelike ure in ‘n hospitaal kan laaaaank voel!) het hy begin benoud word. Nie van sy borsie nie, maar van sy toe neus! Druppels word klokslag ingegooi, suurstof hardloop op ‘full blast’ en skielik sit ek met ‘n kermende mensie wat hyg-hyg en gor-gor snak na sy asem!

Dank Vader die pediater het vroeg rondte kom doen en hom haastig by my geneem toe sy sien hoe hy sukkel en stoei.

Nou ja, slyme is uitgesuig (die goed gaan lê glo soos ‘n oester agter in die nasofariks), nóg neusdruppeltjies…en my klein mensie skep weer genoeg lug om hom te verlustig aan moedersmelk…

Vrede,
Alyssa ♡

NS. As dit by jou eie kinders kom, raak die skerpste dokter maar lekker dom. Skies, ek veralgemeen nou erg. Maar ons is net nie objektief genoeg nie. Daar’s net té veel emosies betrokke. Daarom is ek maar eerder oorversigtig en kry maklik ‘n tweede opinie. My kinders het ‘n wonderlike pediater…

Foto:
My vriendin het hierdie oulike apparaat aangekoop – die BabyVac. Dit werk soos ‘n bom. Konnekteer hom aan die stofsuier en ‘whaa-laa’.
(Kry hom by Dis-Chem Pharmacies)

Oppas net vir té veel gebruik – dit kan die delikate slymvliese irriteer om nóg meer slym te produseer en swelling te veroorsaak. Sien die vervaardigers se aanwysings.